venres, 16 de outubro de 2020

Hoxe é o día do TDL

 


Contos para unha nova realidade

Dende o Departamento de Orientación propuxemos accións co fin de "quitar" medos relacionados coa COVID-19 como, por exemplo, a lectura de contos relacionados coa nova realidade que nos tocou vivir. 

Recomendamos ás familias o libro "Cuentos para una nueva realidad" de Begoña Ibarrola (Ed. Destino). Inclúe diferentes contos e propostas sinxeliñas para falar con nenas e nenos e para levar a cabo na familia ou na escola.

Tamén modificamos a coñecida no protocolo como aula de illamento e convertírmola no "Espazo de descanso" co fin de que resulte máis acolledor para nenas e nenos.



mércores, 7 de outubro de 2020

Todo vai ir ben

Xa vai facer un mesiño que estamos no cole e é bastante diferente ao cole que coñeciamos. 

Hai moito que se bota en falta: ver os sorrisos ou os ocos deixados polos dentes que caíron, a entrada chea de mamás, papás, avoas, avós, nenas e nenos, a emoción coa que ensinan un xoguete ou un libro traído da casa, ata se botan de menos as gaivotas pousadas no tellado para arrasar coas miguiñas das merendas...

E vós, que botades de menos? Podedes deixar un comentario co que botades de menos.

Como di a canción que compartimos con vós, todo vai ir ben! Coidémonos moito e moito ánimo! 




domingo, 27 de setembro de 2020

Resultados da enquisa ás familias sobre temas para os Encontros de Familias

Dende aquí podedes acceder aos resultados da enquisa ás familias sobre que temáticas son do voso interese de cara a organizar os Encontros de Familias 👪👬👭

Por outra banda, tamén vos informamos de que trataremos de levar a cabo algunha/s xornada/s para axudar ás nais e aos pais ao manexo das tecnoloxías (móbil, portátil, tablet...) co fin de axudar a fillas e fillos nas tarefas escolares 💻📱

 

sábado, 26 de setembro de 2020

Webinar "Claves para potenciar a aprendizaxe dende a casa".

 


Rafael Samper, experto no método Kumon, analizará os obxectivos para poder espertar e potenciar nas fillas e nos fillos a emoción de aprender, as habilidades que precisan para facelo con autonomía, sexa en clases presenciais ou online. 

venres, 25 de setembro de 2020

No colexio protexémonos coas máscaras

As nenas e os nenos do cole realizamos os nosos retratos con máscara 

Protéxeme, protéxete, usa a máscara!